Rusiya XİN: “Moskva Bakı və Yerevanla sərhəddəki münaqişənin həlli istiqamətində işlərini davam etdirir”

“Rusiya, Azərbaycan və Ermənistan xarici işlər nazirlərinin sərhəddəki gərginliyin həlli ilə bağlı üçtərəfli görüş planı hələlik yoxdur”.

TASS-a istinadən Respublikaxəbər.az xəbər verir ki, bu sözləri Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirilən brifinqdə deyib.

“Əgər belə bir görüşlə bağlı informasiya yayılsa, biz bunu KİV-lərlə bölüşəcəyik. Hazırda bununla bağlı heç məlumat yoxdur”. - o bildirib.

Bununla yanaşı, diplomat qeyd edib ki, Rusiya xarici işlər və müdafiə idarələrinin nümayəndələri sərhəddəki münaqişənin həlli üçün erməni və azərbaycanlı həmkarları ilə işləməyə davam edirlər.

Qeyd edək ki, iyulun 12-də Ermənistan silahlı qüvvələrinin bölmələri Azərbaycan Ordusunun Tovuz rayonu istiqamətindəki mövqelərinə artilleriya zərbələri ilə hücum etməyə cəhd göstərib.


Sənəm Əliyeva