Şəhid Rəşadət Musayevin doğum günüdür

Bu gün şəhidimiz Rəşadət Musayevin doğum günüdür. Rəşadət Vüqar oğlu Musayev 2002-ci il iyun ayının 20-də Şəki rayonunun Baş Göynük kəndində anadan olub. 2008-ci ildə Baş Göynük 1 saylı tam orta məktəbə qədəm qoyub, 2020-ci ildə həmin məktəbin 11-ci sinfini bitirib. 2020-ci il iyul ayında həqiqi hərbi xidmətə çağırılıb. Həmin il sentyabr ayının 27-də başlayan 2-ci Qarabağ müharibəsi Rəşadətin vətən torpağının işğaldan azad edilməsində iştirak etmək arzusunu gerçəkləşdirib. O Qubadlı, Füzuli, Zəngilan, Cəbrayıl uğrunda gedən döyüşlərin fəal iştirakçısı olub. 2020-ci il oktyabr ayının 24-də Füzuli istiqamətində gedən ağır döyüşlərdə şəhidlik zirvəsinə yüksəlib. Oktyabr ayının 25-də Baş Göynük kəndində dəfn olunub. Ölümündən sonra Respublika Prezidentinin sərəncamı ilə döyüşdə göstərdiyi şücaətə görə “Vətən uğrunda”, “Füzulinin azad olunmasına görə” medalları ilə təltif edilib.
Allah rəhmət eləsin!




Respublikaxeber.az