Şəki DYP “Yol hərəkəti qaydalarını uşaqlara necə öyrədək” adı altında maarifləndirmə tədbirlərini davam etdirir

Şəki Şəhər-Rayon Polis Şöbəsinin Dövlət Yol Polis Bölməsi, uşaqlar gələcəkdə yol hərəkəti qaydalarını daha rahat və asan şəkildə mənimsəsinlər deyə, onlarda indidən yol hərəkəti qaydalarının öyrənilməsinə həvəs və marağın artırılması məqsədilə rayonun məktəbəqədər təhsil müəssisələrində maarifləndirmə tədbirlərini davam etdirir.
Növbəti tədbir, 2022-ci il avqustun 16-da Şəki şəhəri 14 saylı uşaq bağçasında keçirilib.
Respublikaxəbər.az məlumat verir ki, tədbir zamanı, uşaqlara əyani vasitələrdən istifadə etməklə avtomobil, piyada, küçə, yol, səki, svetofor, piyada keçidi və digər anlayışlar barədə ətraflı məlumatlar verilib. Eləcə də, uşaq bağçasının rəhbərliyi və tərbiyəçilərinə tövsiyyə edilib ki, uşaqların məktəblilər tərəfindən bağçalara ötürülməsinə imkan verilməsin. Uşaqlar bağçalara ancaq valideynlər tərəfindən aparılmalıdır. Valideynlər özləridə qaydalara əməl etməlidir. Belə ki, uşağı aparan valideyn uşağın əlindən tutmalı, səkilərlə hərəkət etməli, səki yoxdursa küçənin tam kənarı ilə, yollarda isə ehtiyat hissə ilə hərəkət etməlidir. Uşaqlar valideynlərin nəqliyyat axını olmayan tərəfdə olmaqla əlindən tutmalıdır. Valideynlər yaxınlaşan nəqliyyatın hərəkətinə qarşı diqqətli olmalıdır.

Uşaq bağçalarının rəhbərliyi və tərbiyəçilərinə tövsiyyə olunub ki, valideyn iclasları təşkil olunarkən, onların nəzərinə çatdırılsın ki, azyaşlı uşaqları küçə və yollara nəzarətsiz buraxmasınlar, dükanlara göndərməsinlər. Uşaqların velosiped və ya arabacıqlar sürmələri, topla oynamaları üçün nəqliyyat olmayan yerlər, qapalı məkanlar seçilsin.
Daha sonra, uşaqlar, yol hərəkəti qaydalarına aid bilik və bacarıqlarını nümayiş etdirib, yol hərəkəti qaydalarına aid şeir və mahnılar səsləndiriblər. Ən yaxşı şeir söyləyərək fərqlənən Məmmədəliyev Nurxan Vüsal oğluna Dövlət Yol Polis Bölməsinin təbliğat və təşviqat üzrə inspektoru, polis baş leytenantı Tural Niftalıyev tərəfindən həvəsləndirici mükafat, hədiyyə təqdim olunub.
Tədbirin sonunda, 14 saylı uşaq bağçasının müdiri Güllər Mənəfova, çıxış edərək qeyd edib ki, polis baş leytenantı Tural Niftalıyev hər il bağçaya gələrək şagirdləri maarifləndirir. Uşaq bağçasının kollektivi, 30 mart 2018-ci il tarixdə keçirilən tədbirdə çəkilmiş fotoşəkillərdən ibarət “UŞAQ BAĞÇAMIZIN DOSTU” adlı guşə yaradaraq bağçanın dəhlizində asıb. Bağçaya gələn qonaqlar bu guşəni gördükdə Dövlət Yol Polisinin uşaqlarla dostluq etməsini yüksək qiymətləndirdiklərini bildirirlər. Bağçanın müdiri Güllər Mənəfova, belə maarifləndirici tədbirlərin böyük əhəmiyyət kəsb etdiyini qeyd edərək, yekunda bir daha bağçanın kollektivi adından Dövlət Yol Polis Bölməsinin təbliğat və təşviqat üzrə inspektoru, polis baş leytenantı Tural Niftalıyevə minnətdarlığını bildirib.