Ərli bacısının sevgilisini öldürdü

Bakıda qətl törətməkdə təqsirləndirilən Elnur Abdullayevin cinayət işi üzrə məhkəmə prosesi davam edir.
Ölkə.Az istinadən Respublikaxebere xəbər verir ki, Bakı Ağır Cinayətlər Məhkəməsində hakim Siyavuş Hacıyevin sədrliyi ilə növbəti məhkəmə prosesi bu gün keçiriləcək.
Qeyd edək ki, qətl hadisəsi ötən ilin noyabr ayında Sabunçu rayonunun Zabrat qəsəbəsində baş verib.

Avtoyuma məntəqəsində işləyən Murad Quliyev Qəbələ rayon sakini, 27 yaşlı Elnur Abdullayev tərəfindən qısqanclıq zəminində öldürülüb.

Bildirilir ki, M.Quliyev internet vasitəsilə 2 uşaq anası olan Almaz Abdullayeva (ad şərtidir) ilə tanış olub. Daha sonra qadın uşaqlarını Qəbələdə ataraq Bakıya gəlib, M.Quliyevlə 2 aya yaxın birgə yaşayıb.
M.Quliyev qadınla birgə Qəbələyə gedib. Məqsəd isə qadının rəsmi nikahda olduğu şəxsdən boşanmaq üçün məhkəməyə müraciət etməsi olub.
Lakin Qəbələdə olarkən qadının ailə üzvləri onun M.Quliyevlə Bakıya qayıtmağına icazə verməyib və həmin şəxsin onlara el adəti ilə elçi gəlməsini istəyib. M.Quliyev Bakıya gəlib, lakin o, qeyri-rəsmi münasibətdə yaşadığı qadının ailəsinin istədiyi kimi etməyib və onlarla əlaqəni tamamilə kəsib.

Qadının qardaşı E.Abdullayev özü ilə bıçaq götürərək Bakıya gəlib, M.Quliyevi tapıb və ona bir neçə zərbə endirib. M.Quliyev aldığı xəsarətlərdən hadisə yerindəcə keçinib.