Azərbaycanda əsgəri öldürməyə cəhd edən şəxsə 11 İL CƏZA

Dövlət Sərhəd Xidmətinin hərbi hissəsinə gələrək orada əsgəri öldürməyə cəhd etməkdə təqsirləndirilən 1986-cı il təvəllüdlü Camal Hüseynova hökm oxunub.

Sonxeber.az-a istinadən Respublikaxeber.az verdiyi xəbərə görə, Bakı Ağır Cinayətlər Məhkəməsinin hökmü ilə C.Hüseynov 11 il müddətinə azadlıqdan məhrum edilib.

Qeyd edək ki, Cəlilabad rayon sakini, 1997-ci il təvəllüdlü Ceyhun İsgəndərov 2018-ci ilin iyul ayında hərbi xidmətə gedib. Sentyabrın 8-də Dövlət Sərhəd Xidmətinin N saylı hərbi hissəsində mülki şəxs tərəfindən bıçaqlanıb.

Camal Hüseynov hərbi hissəyə gələrək yalandan əsgər Ceyhun İsgəndərovun valideynlərinin göndərişi ilə onunla görüşə gəldiyini deyib. Orada qəfildən əsgərin döş və qarın nahiyəsinə özü ilə gətirdiyi bıçaqla 3 zərbə endirib. Yaralı əsgər xəstəxanaya çatdırılıb və onun həyatını xilas etmək mümkün olub.

C.Hüseynov hadisəni namus üstündə törətdiyini deyir. İddia edib ki, Ceyhun əsgərliyə getməmişdən əvvəl onun xanım qohumuna sataşıb.