“Əgər kolbasa və sosiska ətdən hazırlanırsa, niyə ucuz qiymətə satılır?” - Ekspert danışır

Azərbaycanda müxtəlif müəssisələrin istehsal etdiyi kolbasa və sosiska məmulatları satılır. Məhsullar keyfiyyətinə uyğun olaraq müxtəlif qiymətlərə təklif edilir. Bəzən dadlı, gözəl görüntüyə malik sosiskanın ucuz olması insanda şübhələ yaradır?
Görəsən nə yeyirik?

Çox zaman istehlakçıları bir sual maraqlandırır : “Əgər kolbasa və sosiska ətdən hazırlanırsa, niyə ucuz qiymətə satılır”? Həqiqətənmi Azərbaycan bazarında ətdən hazırlanmış, yüksək keyfiyyətli kolbasa-sosiska məhsulları yoxdur? Bəs yüksək keyfiyyətli hesab etdiyimiz xarici ölkələrdə istehsal edilmiş kolbasalar həqiqətənmi düşündüyümüz kimidir?

Respublikaxeber.az xəbər verir ki, bu kimi sualları Bizimyol.info-ya “Azad İstehlakçılar” Birliyinin sədri Eyyub Hüseynov cavablandırıb: “Kolbasa və sosiska məmulatları ilə bağlı hər gün “Azad İstehlakçılar” birliyinə müraciətlər daxil olur. Bu məhsulların qiyməti, tərkibi, etiketi ilə bağlı çoxsaylı telefon zəngləri var. Verilən suallar arasında xaricdən gətirilən məhsullarla yerli məhsulların müqayisəsinə dair suallar da var. Xaricdən gətirilən kolbasa və sosika məmulatları ilə bağlı problemlər yaşanır. “Azad İstehlakçılar” Birlyinin dünyanın 123 ölkəsi ilə əlaqəsi var. O cümləədn kolbasa və sosiska məmulatlarının ixracatı ilə məşğul olan ölkələrlə də əlaqələrimiz var. Uyğun təşkilatlar həmin ölkələrdə də var. Biz daim məlumatlar alırıq. Və məlum olur ki, yüksək texnologiyalarla istehsal edilmiş və Azərbaycana gətirilmiş kolbasa məmulatlarının içərisində demək olar ki, ətdən başqa hər şey var. Bu kolbasalarda süni ət, soya unu, sümük unu (Azərbaycanda heyvanların sümüyü atılır, Rusiyada sümüklər una çevrilib, kolbasalaar qatılır) donuz və müxtəlif heyvanların dərisi, heyvanların tullantısı hesab edilən bütün elementler kolbasa və sosiskalara vurulur. Xaricdən gətirilən bu kolbasaların etiketlənməsi çox yaxşı olur, rəngi-dadı öz yerində olur. Onlara çox sayda dadlandırıcı, rəngləndirici və qoxu verən maddələr vurulur. Uzaqdan gətirildiyi üçün yolda keyfiyyətini də itirə bilir”.

E.Hüseynov bildirir ki, bəzi ölkələrədə kolbasa və sosiska məmulatları satılmır: “ Məsələn Kanadada kolbasa və sosiska məmulatları Rusiya məhəlləsində fəaliyyət göstərən mağazalarda satılır. Bu məhsullar da Rusiyadan gətirilir. Kanadada kolbasa istehsalı demək olar ki, yoxdur”.

Ekspert bildirir ki, Azərbaycan əmtəə bazarında təzə ətdən kolbasa istehsal edən müəssisələr mövcuddur. Ölkədə qiyməti 4 manata olan ət var, amma bu ətlər qocalmış heyvanların ətidir. Bu ətlər yemək üçün uyğu deyil. Qəssablar belə heyvanları alıb kəsmədiyi üçün belə heyvanlar kolbasa müəssisələrinə verilir. Bu səbəbdən də ucuz kolbasa məmulatları satılır.

Azərbaycanda kolbasa və sosiska istehsal edən müəssisələr təkcə yerli qocalmış heyvan ətləri ilə deyil, eləcə də xarici ölkələrdən gətirilmiş, məsələn Hindistandan gətirilmiş ətlərlə də kolbasa istehsal edirlər: “Bizim Birliyinin Hindistanda qurumu var, əməkdaşlarımız var. Mən özüm də Hindistana getmişəm. Orada mal əti yeyilmir. Bu səbəbdən də Azərbaycan bazarına ucuz qiymətə gəlib çıxır”.

E.Hüseynov bildirir ki, Azərbaycanda təhlükəli, standarta uyğun olmayan kolbasa istehsalı da mövcuddur. Bu kolbasalar gözəl qırmızı görüntüyə malik olub etiketsiz şəkildə metro çıxışlarında satılır.

Ekspertin sözlərinə görə, ölkədə 20-yə yaxın standartlara uyğun olmayan kolbasa istehsalı ilə məşğul olan müəssisələr mövcuddur. Daxili İşlər Nazirliyinin Baş Cinayətkarlıqla Mübarizə İdarəsi dəfələrlə ölkənin müxtəlif bölgələrində at, eşşək, murdar olmuş heyvan ətinin kəsildiyini ifşa edib. Bu ətlərin bir hissəsi şübəsiz ki, kolbasa sexlərinə yol tapır.

Ölkədə istehsal edilən kolbasa məmulatlarının yararlılıq müddəti ilə xaricdə istehsal edilən kolbasa məhsullarının yararlılıq müddəti müqayisə edildiyi zaman məlum olur ki, Azərbaycanda istehsal edilən kolbasa məmulatlarının yararlılıq müddəti daha qısadır. Bu isə o deməkdir ki, məhsul daha az kimyalaşıb. “Bəzən istehlakçılar xaricdən gətirilən kolbasaların qiyməti baha olduğu üçün onu daha keyfiyyətli hesab edir. Bu istehlakçını aldadan bir amildir. Azərbaycan marketlərində yerli ət məhsullarına 30, xarici məhsullara isə 70-80 faiz yer verilir. Bu, doğru deyil. İstehlakçılar bütün hallarda yerli məhsullara üz tutmalıdır”,- deyən ekspert vurğulayıb ki, ölkədə “Halal” etiketi ilə istehsal edilən kolbasa məhsulları da var. Bu məhsulların bir hissəsi həqiqətən halal məhsul olsa da, bəziləri yalandan etiketlənir.