Ermənistanda yeni prezidenti kimdir - baxaq, görək, Xaçaturun xançalı varmı?

Martın 3-ü Ermənistan parlamentində prezident seçkisi keçirilib.

Respublikaxeber.az xəbər verir ki, yeganə iddiaçı olan hakim Vətəndaş Sazişi Partiyasının namizədi Vaahn Xaçaturyan gizli səsvermədə 71 səs toplayaraq dövlət başçısı postuna mandat alıb. O, 10 gün ərzində and içərək səlahiyyətlərinin icrasına başlamalıdır.

Ermənistan parlamenti 107 deputatdan ibarətdir. Baş nazir Nikol Paşinyanın sədrlik etdiyi Vətəndaş Sazişi Partiyası qanunverici orqanda 71 mandatla təmsil olunur.

Müxalifət prezident seçkisini boykot edib. İkinci prezident Robert Köçəryana bağlı Ermənistan blokunun parlamentdə 29, üçüncü prezident Serj Sərkisyana bağlı “Qürurluyam” blokunun 6 mandatı var.

Vaahn Xaçaturyan 1959-cu il aprelin 22-də doğulub. İqtisadçıdır. “Razdanmaş” İstehsalat Birliyində çalışıb, “Mars” dövlət müəssisəsində baş direktorun müavini postunu tutub, paytaxt Yerevanın meri, Ermənistan prezidentinin müşaviri, parlamentin deputatı olub.

2000-ci ildən vətəndaş cəmiyyəti qurumlarında rəhbər vəzifələrdə işləyib, 2019-2021-ci illərdə bank sistemində fəaliyyət göstərib.

2021-ci il avqustun 4-dən yüksək texnologiyalar sənayesi naziri idi.

Əvvəlki prezident Armen Sərkisyan yanvarın 23-də istefa verib, fevralın 1-dən prezident səlahiyyətləri parlamentin sədri Alen Simonyana keçib.

7 il müddətinə seçilən prezidentin səlahiyyətləri məhduddur. Ermənistan Konstitusiyasına görə, prezident parlamentin qəbul etdiyi qanunları 21 gün ərzində imzalayır və yaxud həmin müddət ərzində Konstitusiya Məhkəməsinə müraciət edir. Konstitusiya Məhkəməsi qanunun konstitusiyaya uyğunluğuna rəy versə, prezident 5 gün ərzində onu imzalamağa borcludur. Əks halda həmin qanunu imzalamaq hüququ parlament sədrinə keçir.

Yeni seçilmiş parlament fəaliyyətə başlayan gün prezident hökumətin istefasını qəbul edir. Nazirlər Kabineti üzvləri baş nazirin təqdimatı ilə təyin olunur.

Prezident xarici siyasət sahəsində bu səlahiyyətlərə sahibdir: hökumətin təqdimatı ilə beynəlxalq müqavilələr bağlamaq; baş nazirin təqdimatı ilə xarici ölkələrdə və beynəlxalq təşkilatlarda diplomatik nümayəndələri təyin etmək və onları geri çağırmaq; xarici ölkələrin və beynəlxalq təşkilatların diplomatik nümayəndələrinin etibarnaməsini qəbul etmək.

Prezidentin ratifikasiya tələb etməyən beynəlxalq müqavilələri hökumətin təqdimatı ilə təsdiq və ləğv etmək, baş nazirin təqdimatı ilə ali diplomatik rütbələr vermək səlahiyyəti də var.

Silahlı Qüvvələrlə bağlı səlahiyyətlər belədir: baş nazirin təqdimatı ilə qoşunların ali komandan heyətini vəzifəyə təyin və vəzifədən azad etmək; baş nazirin təqdimatı ilə ali hərbi rütbələr vermək.

Vətəndaşlıq məsələlərinin həlli, əfv, orden və medallarla, fəxri adlarla təltif prezidentin səlahiyyətidir.

Prezident parlamentin təsdiqi gecikdirilən halda bəzi vəzifələrə müvəqqəti icraçı təyin edə bilər.