PAŞİNYAN İKİ OD ARASINDA VİDEO

Ermənistanda baş nazirə qarşı prezident və müxalifət işbirliyi
Ermənistan prezidenti Armen Sarkisyan bu gün müxalifət nümayəndələri ilə görüşməyi planlaşdırır.

Bunu baş nazir Nikol Paşinyanın istefasını tələb edən siyasi qüvvələr birliyi – müxalif “Vətənin xilası hərəkatı”nın nümayəndəsi İşxan Saqatelyan deyib.

Onun sözlərinə görə, əvvəlki görüş zamanı müxalifət öz mövqeyini təqdim edib və Baş Qərargah rəisinin istefası ilə bağlı məsələnin Konstitusiya Məhkəməsinə göndəriləcəyinə dair zəmanət alıb: “Hələlik yekun cavab almamışıq, bazar ertəsi gününə qədər müddətimiz var. Prezident Konstitusiya Məhkəməsinə müraciət etmək məcburiyyətindədir, əks halda ölkədəki vəziyyət və sonrakı nəticələr üçün şəxsən məsuliyyət daşıyacaq”.

Siyasətçi, həmçinin Baş Qərargah rəisini öz vəzifəsini tərk etməməyə çağırıb.

Qeyd edək ki, prezident Baş Qərargah rəisinin istefası ilə bağlı fərman imzalamaqdan imtina edib və həmçinin fərman layihəsini Konstitusiya Məhkəməsinə də göndərməyib. Bu isə avtomatik istefanı nəzərdə tutur.

Prezidentin mətbuat xidmətindən bildirilib ki, Armen Sarkisyan Konstitusiya Məhkəməsində fərman layihəsinin özünə deyil, Silahlı Qüvvələrdə kadr məsələlərini tənzimləyən “Hərbi xidmət və hərbi qulluqçuların statusu haqqında” Qanunun müddəalarına etiraz edib.

Bu arada, Ermənistan müxalifəti parlament binası qarşısında mitinq keçirib.

Aksiyada 2 mindən çox adamın iştirak etdiyi deyilir. Hadisə yerinə xeyli sayda polis cəlb edilsə də, onların əksəriyyəti qoruma ləvazimatı ilə təchiz olunmayıb.

Bununla yanaşı, xeyli sayda keçmiş hərbçi də mitinqə qoşulub.

Ermənistanda Qarabağ məğlubiyyətindən sonra başlayan siyasi böhran fevralın 25-də baş qərargah rəisi və 40-dək hərbi rəhbərlik nümayəndəsinin baş nazir Nikol Paşinyandan istefa verməyi tələb etmələri ilə daha da kəskinləşib.

Respublikaxəbər.az 0518310101