Şəhid Rəşadət Vüqar oğlu Musayevin sabah anım günüdür.

Respublikaxəbər.az xəbər verir ki, sabah, 25 oktyabr 2021-ci il tarixdə 28 ildir ki, işğal altında olan torpaqlarımızın azadlığı uğrunda qəhrəmancasına vuruşaraq, həlak olub, şəhidlik zirvəsinə yüksələn şəhid Musayev Rəşadət Vüqar oğlunun şəhadətindən bir il ötür. Anım günüdür. Mübarək şəhidimiz Rəşadət Musayev Vüqar oğlu, 2002-ci il 20 iyun tarixində Şəki rayon Baş Göynük kəndində anadan olub.
2008-2019-cı illərdə Şəki rayon Baş Göynük kəndi tam orta məktəbində orta təhsil alıb. 2020-ci ilin iyul ayında Səfərbərlik və Həqiqi Hərbi Xidmətə Çağırış üzrə Dövlət Xidmətinin Şəki rayon bölməsindən həqiqi hərbi xidmətə çağrılıb.
Azərbaycan Ordusunun əsgəri olan Rəşadət Musayev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində Füzuli, Xocavənd və Qubadlı istiqamətində gedən döyüşlərdə olub. Rəşadət Musayev oktyabrın 25-də Qubadlı istiqamətində gedən döyüşlər zamanı şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Rəşadət Musayev ölümündən sonra "Vətən uğrunda" medalı ilə təltif edildi.

Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Rəşadət Musayev ölümündən sonra "Xocavəndin azad olunmasına görə" medalı ilə təltif edildi.
Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Rəşadət Musayev ölümündən sonra "Füzulinin azad olunmasına görə" medalı ilə təltif edildi.
Fürsətdən istifadə edərək, redaksiyanın rəhbəri olaraq, ilk öncə özümün, və sonra da redaksiya heyyətimin adından şəhidimizin ailəsinə uca Allahdan səbr, şəhidimizə isə rəhmət diləyirik. Cümlə şəhidlərimizə Allah rəhmət etsin.
Respublikaxəbər.az
Elyaz (Yazan) Gülüyev