ŞƏKİDƏ GƏLİN ƏRİ VƏ BALDIZLARI TƏRƏFİNDƏN HÜCUMA MƏRUZ QALDI, DÖYÜLƏRƏK KÜÇƏYƏ ATILDI? YENİLƏNDİ

RESPUBLİKAXƏBƏR.AZ-a şikayət edən, Abdurrahmanova (Babayeva) Çinarə Telman qızı, 26 sentyabr 2024-cü il tarixdə Baş Göynük kəndində yaşadığı evə əri və baldızlarının gələrək onu döydüyünü və ərinin onun boğazına bıçaq dirəyərək, ölümlə hədələdiyini bildirmişdir.
Deyilənlərlə bağlı tərəfimizdən Şəki ŞRPŞ-nə məlumat verilmiş, ŞŞRPŞ-dən də həmin faktla bağlı araşdırma aparıldığını, nəticəsi barədə qərar qəbul ediləcəyi bildirilmişdir.
Şikayətçinin qeyd etdikləri barədə daha ətraflı gün ərzində məlumat verəcəyik!

Qarşı tərəflə də əlaqə saxlamağa çalışırıq!
Qarşı tərəfi də dinləyərək, hər iki tərəfin bildirdiklərini diqqətinizə çatdıracağıq.


Dəyərli izləyicilər!
Məlumdur ki, gün ərzində daha ətraflı məlumat verəcəyimizi bildirmişdik.


Şikayətçi vətəndaş: Abdurahmanova (Babayeva) Çinarə Telman qızı ilə redaksiya heyyətinin rəhbəri Elyaz Yazan arasındakı dialoqu olduğu kimi (təfərrüatlı şəkildə) qeyd edirik.

Elyaz Yazan:
Çinarə xanım, Siz və Sizin valideyniniz redaksiyamızın qaynarxətt nömrəsinə zəng edərək, Sizin əriniz Tural Babayev və onun bacıları tərəfindən döyüldüyünüzü və həmçinin də ərinizin Sizin boğazınıza bıçaq dirəməklə, ölümlə hədələndiyinizi bildirmisiniz. Bu barədə daha ətraflı danışmağınızı xahiş edirik.

Çinarə (Babayeva)

Bəli, mən, təxminən 9 ildir ki, həmkəndlim Babayev Tural Əhməd oğlu ilə ailəliyəm, bizim cütlüyümüzdən 3 azyaşlı uşağımız var, ailə həyatı qurduqdan sonra təxminən 2-3 ay mehriban yaşamışıq. Bu günə qədər mütəmadi olaraq aramızda mübahisə və münaqişələrimiz olmuşdur. Ən sonuncu dəfə təxminən bir ay bundan öncə məni əxlaqsızlıqda ittiham etdiyinə görə ayrılmışdıq. Sonra mən, Şəki Şəhər 1 saylı Mediasiya şurasına və eləcə də Şəki rayon məhkəməsinə iddia ərizəsi ilə müraciət etdik, nəhayət ki, sonra ərim Tural ayrılmaq istəmədiyini bildirdiyi üçün, həm də azyaşlı uşaqlarımı nəzərə alıb barışdıq.
Nəhayət ki, sonuncu dəfə dünən də yaşadığım evə ərim və baldızım gələrək məni döydülər, ərim də mənim boğazıma bıçaq dirəyərək, öldürəcəyini bildirdi və məni küçəyə atdılar.
Elyaz Yazan:
Çinarə xanım, Siz hazırda hüquq-mühafizə orqanlarına müraciət etmisinizmi?
Çinarə (Babayeva):
Bəli, Elyaz müəllim!
DİN-nin 102 zəng xidmətinə müraciət etmişəm və hazırda Şəki ŞRPŞ-də araşdırma aparılır. Əlavə olaraq, bir müraciətimi də bildirim ki, uşaqların atası Tural Babayev, mənim icazəm olmadan, Şəki rayon, 2 saylı tam orta məktəbə gedərək, uşağımı məcburi şəkildə götürüb aparmışdır. Hazırda mənim uşaqlarımı da qaytarmır. Sizdən xahiş edirəm mənə köməklik göstərin.

Deyilənlərlə bağlı Tural Babayevlə əlaqə saxlayaraq, həyat yoldaşı Çinarə Babayevanın müraciətində bildirdiklərini diqqətinə çatdırdıq. Tural Babayev isə həmin gün Çinarəni görmədiyini, bacısı ilə arasında mübahisə və münaqişə olduğunu, hal hazırda isə Şəki ŞRPŞ-də araşdırma aparıldığını, ifadəsini də verdiyini bildirdi.
Ayrıca olaraq, həyat yoldaşını əxlaqsızlıqda ittiham etdiyini əsaslandırmasını xahiş etdik. Tural Babayev bir daha həyat yoldaşını əxlaqsızlıqda ittiham edərək, sübuta yetirə biləcəyini dedi.

Odur ki, hər iki tərəfin qeyd etdiklərini özlərinin icazəsi əsasında səsyazısı olaraq qeyd etdiyimiz üçün aidiyyatı üzrə tərəfimizdən Şəki ŞRPŞ-nə rəsmi məlumat məktubu ünvanlanmaqla, tam obyektiv, qərəzsiz, doğru-dürüst və hərtərəfli araşdırma aparılaraq, ədalətli qərar qəbul edilməsini xahiş edəcəyik.


Respublikaxəbər.az