Narkotiklərin satışı ilə məşğul olan transmilli cinayətkar şəbəkənin üzvlərini həbs edib

Gürcüstanda narkotiklərin satışı ilə məşğul olan beynəlxalq şəbəkənin üzvləri saxlanılıb. Həbs olunanlar əsasən Gürcüstan, Bolqarıstan və Türkiyə vətəndaşlarıdır.
Respublikaxeber.az xəbər verir ki, bu barədə Gürcüstan Daxili İşlər Nazirliyi və Baş Prokurorluğunun yaydığı birgə məlumatda bildirilir.
Qeyd olunub ki, uzun müddət müxtəlif regionlarda aparılan istintaq hərəkətləri nəticəsində transmilli cinayətkar dəstənin 22 üzvü saxlanılıb.
Cinayətkar dəstənin üzvləri müxtəlif vaxtlarda Gürcüstana külli miqdarda heroin, kokain, buprenorfin, metadon, metamfetamin, amfetamin və MDMA kimi narkotik maddələr gətiriblər. Narkotik vasitələr həm Gürcüstan daxilində satılıb, həm də başqa ölkələrə daşınıb. Cinayətkar dəstənin fəaliyyətinə vəkillər dəstək veriblər. Vəkillər narkotiklərin satışına, narkotacirlərin hesablarına nəzarəti və çirkli pulların yuyulmasına nəzarət ediblər.
Əməliyyat-axtarış tədbirləri nəticəsində dəstə üzvlərinin evlərindən xeyli miqdarda narkotik maddə, silah-sursat, kompüterlər, mobil telefonlar və avtomobillər götürülüb.
Saxlanılan şəxsləri 20 ildən çox, hətta ömürlük həbs cəzası gözləyir.