Banklarda əmanət faizləri inflyasiya rəqəmlərindən niyə aşağıdır?

Hazırda manatla əmanət faizləri təxminən 8-10% civarındadır. Amma rəsmi inflyasiyanın ikirəqəmli həddə olduğunu nəzərə alsaq, depozitdən götürülən gəliri inflyasiya "yeyir". Başqa sözlə, əmanətdən gələn azanc inflyasiyanın qurbanına çevrilir.

Respublikaxeber.az-ın xəbərinə görə, iqtisadçı Rəşad Həsənov deyir ki, depozit faizləri bazarda olan tələb və təklifə əsasən formalaşır. Eyni zamanda hazırda banklar əmanətlərə bir o qədər də ehtiyac duymur. Bunun da müəyyən səbəbləri var.

Rəşad Həsənov bildirir ki, əmanət mexanizminin qoyulan vəsaiti infilyasiyadan qorumaq üçün hər hansı bir rəsmi öhdəliyi yoxdur. Ancaq vətəndaş banka deposit qoymaqla vəsaitini baş verə biləcək infilyasiyanın zərərlərindən qismən də olsa qoruya bilər.

İqtisadçı deyir ki, banklar yalnız o halda depozit faizlərini qaldıra bilərlər ki, infilyasiya olduqca sürətli olsun və insanlar banka ümumiyyətlə pul qoymasınlar.