Bu gün şəhid RƏVAN LƏTİFOVUN doğum günüdür- Yaşasaydı, 30 yaşı tamam olacaqdı

Azərbaycanın ərazi bütövlüyü uğrunda gedən Vətən müharibəsində döyüşlərdə qəhrəmancasına şəhid olan Rəvan Lətifovun bu gün doğum günüdür. Yaşasaydı, 30 yaşı tamam olacaqdı.



"Respublikaxeber.az" xəbər verir ki, şəhidimiz “Qalib Müəllim” Rəvan Ömür oğlu Lətifov 26 avqust 1991-ci ildə Oğuz rayon Xaçmaz kəndində ziyalı ailəsində dünyaya gəlmişdir. Rəvan Xaçmaz kəndində orta məktəbi bitirib sənədlərini Azərbaycan Dövlət Pedaqoji Universitetinə verir. Təhsilini təşkili və idarə olunması ixtisasına yiyələnir.



2012-ci ildə Naxçıvan Muxtar Respublikasının Şərur rayonunda “N” saylı hərbi hissədə Tank əleyhinə batareyada hərbi xidmət keçir. Oğuz rayon Sincan kənd tam orta məktəbində məktəbdən kənar və sinifdən kənar xaric tərbiyə işi üzrə təşkilatçı vəzifəsində işə başlayır.



20.09.2020-ci ildə döyüşlərə qatılır. Milli Ordu Sıralarında Hərbi təlimlərdə iştirak edir. Rəvan müəllim Tank əleyhinə batareyanın əsgəri vəzifəsində, Qarabağ uğrunda gedən aktiv Hərbi əməliyyatlarda yaxından iştirak edir. Füzuli rayonunun İkinci Mahmudlu kəndinin işğaldan azad olunmasında və 6 noyabrda isə Şuşa şəhərinin işğaldan azad olunması əməliyyatlarında fəal iştirak edir.



6 noyabr tarixində Rəvan Lətifovunda iştirak etdiyi batareya Daşaltı-Şuşa istiqamətində hücumu keçir. Bu onun son döyüşü olur. Bu istiqamətdə gedən qanlı döyüşlərdə Rəvan Lətifov qəhrəmancasına Şəhid olur.



"Respublikaxeber.az" saytının kollektivi Şəhidin Mehman dayısının ailəsi adından anası Gültəkin müəllimənin ailə üzvlərinə və yaxınlarına dərin hüznlə başsağlığımızı bildiririk.



Ən uca zirvədə dayanmış Şəhidlər bizim qürur mənbəyimiz, and yerimizdir! Onlar Vətən qədər əbədi yaşayacaqlar! Biz onları heç vaxt unutmayacağıq!

Aybəniz Abdulova
Xüsusi Müxbir.