Sülh, yoxsa müharibə? İndi seçim Ermənistanındır – AÇIQLAMA

İkinci Qarabağ müharibəsi bitsə də, Azərbaycanla Ermənistan arasında sülh müqaviləsi imzalanmayıb.

Məlum olduğu kimi, Azərbaycan, Rusiya Prezidentləri və Ermənistan Baş naziri müharibənin bitməsi ilə bağlı üçtərəfli bəyanat imzalayıb ki, orada tərəflərin bir sıra şərtləri öz əksini tapıb.

Amma Ermənistanda hakimiyyət uğrunda mübarizə gedir və məğlub ölkədə Baş nazirin imzaladığı sənədi heç də bütün qüvvələr qəbul etmək istəmirlər. Digər tərəfdən isə bəyanatda öz əksini tapan nəqliyyat əlaqələrinin bərpa edilməsi ilə bağlı məsələ də hələ ki, həllini tapmayıb.


Sülh müqaviləsinin mövcud olmaması yenidən müharibənin başlanması ilə bağlı ehtimalları artırırmı?

Milli Cəbhə Partiyasının sədr müavini, politoloq Məhəmməd Əsədullazadə açıqlamasında bildirib ki, Ermənistan Qarabağ müharibəsində Azərbaycanın uğurlu qələbəsini rəsmiləşdirən 10 noyabr Bəyannaməsində nəzərdə tutulan öhdəliklərin bir neçə bəndinə əməl etmir:

“Bütövlükdə sülh prosesinə aparan məlum bəyannamədəki bəndləri rəsmi Yerevan tam yerinə yetirəcəksə, sülh müqaviləsinin bağlanması mümkündür. Burada kommunikasiyaların açılması və Ermənistan silhahlı qüvvələrinin Qarabağdan çıxarılması ən başlıca motivdir. Hələlik rəsmi Yerevan tələsmir. Amma biz Paşinyanın acıqlamalarında müəyyən ziddiyyətlər görsək də muharibənin əleyhinə və sülhün əldə edilməsi istiqamətində erməni cəmiyyətinə mesajlar verir.

Hesab edirəm ki, Paşinyan hakimiyyətdə qalsa və öhdəliklərin yerinə yetirilməsini reallaşdıra bilsə, sülh müqaviləsi olacaq. Amma revanşistlər hakmiyyəti qəsb etsə, təbii ki, muharibə gündəmə gələ bilər. Fikrimcə, bu Ermənistanın bir dövlət kimi məhvi və Rusiyanın quberniyasına çevrilməsi ilə nəticələnə bilər”.

Respublikaxəbər.az 0518310101