ÜST rəhbəri pandemiyanın yayılmasının sürətlənməsinə dair xəbərdarlıq edib

Bir sıra Avropa ölkələrində koronavirus pandemiyası ilə əlaqədar müsbət irəliləyiş əldə edilməsinə baxmayaraq, pandemiyanın yayılması sürətlənib.

XeberOxu.Az-a istinadən Respublikaxəbər.az-ın məlumatına görə, bu barədə Ümumdünya Səhiyyə Təşkilatının (ÜST) baş direktoru Tedros Qebreyesus danışıb. O, bildirib ki, dünya hazırda yeni və təhlükəli bir mərhələdədir. İnsanların çoxu evdə oturmaqdan bezib və bu, başa düşüləndir. Ölkələr iqtisadiyyatlarını və ictimai həyatı yenidən işlək hala gətirmək istəyirlər. Lakin virus sürətlə yayılır və öldürücü olaraq qalır. Daha çox sayda insan bu virusa yoluxa bilər.

ÜST rəhbəri bir daha insanları sosial məsafə saxlamağa, gigiyena qaydalarına riayət etməyə və əlləri mütəmadi şəkildə yumağa çağırıb. Bildirilib ki, bütün infeksiya ocaqları aşkarlanmalı və yoluxmuş şəxslər təcrid edilərək müalicə olunmalıdır.

Qeyd edilib ki, bir sutka ərzində ÜST-yə bütün dünya üzrə 150 min yeni yoluxma faktına dair məlumat daxil olub. Bu göstərici indiyədək bir sutka üçün olan ən yüksək rəqəmdir. Gündəlik artımın təxminən yarısı Şimali, Mərkəzi və Cənubi Amerikanın payına düşüb, Cənubi Asiya və Yaxın Şərq ölkələrində də yoluxma halları artıb.

Sənəm Əliyeva