Şahid: "Modul Tipli Hospitalın əməkdaşı bizdən 3 500 manat pul istədi"

Bu gün Bakı Ağır Cinayətlər Məhkəməsində Fövqəladə Hallar Nazirliyinin (FHN) Tibb Xidmətinin Modul Tipli Hospitalının baş həkimi İmran Ağayev, müəssisənin vəzifəli şəxsləri olan Rüfət Vəlizadə, Taleh İmanlı və Qulu Orucovun cinayət işi üzrə növbəti məhkəmə prosesi keçirilib.

Respublikaxeber.az xəbər verir ki, hakim Faiq Qəniyevin sədrliyi ilə keçirilən iclasda şahid qismində Günel Abbasova dindirilib.

O bildirib ki, iki xəstəni təqsirləndirilən T.İmanov vasitəsilə FHN-in Tibb Xidmətinin Modul Tipli Hospitalına yerləşdirilməsinə köməklik edib: “Mən “Medikar” klinikasında həkim işləyirdim. Taleh İmanlıya zəng edib dedim ki, xəstə var, onu yerləşdirmək lazımdır. Söylədi ki, problem deyil, gətirərsən. Azər Həsənov adlı xəstəni ora gecə yerləşdirdik. Buna görə Taleh məndən 3 500 manat pul istədi. Məbləğ yüksək olduğuna görə vaxt istədim, ilkin olaraq 500 manat verdim. Sonra dedi ki, pulun qalanını tezləşdirim. Bildirdi ki, “məni də burada incidirlər, pul baş həkimə çatmalıdır”.
Daha sonra ikinci pasiyent Rasim İsmayılovu ora yerləşdirmək istədim. Taleh isə dedi ki, birincinin pulunu mütləq gətir, yoxsa alınmayacaq. Bir gün əvvəl 3 min manat pul verdim. Açığı sonradan xəbər tutdum ki, Azər Həsənov dünyasını dəyişib. İkinci pasiyentə görə Talehlə yenə danışdım. Bu şəxs tanışım olduğu üçün Baş prokuror yanında Korrupsiyaya qarşı Mübarizə Baş İdarəsinə zəng edib, onları məlumatlandırdım. Talehə 3 min manat pulu vermək istəyəndə İdarə əməkdaşları tərəfindən saxlanıldıq”.

Növbəti proses 2022-ci ilin yanvarın 17-nə təyin edilib.

Qeyd edək ki, istintaq zamanı İmran Ağayevin həmin vəzifədə işləyərkən müəssisənin vəzifəli şəxsləri olan Rüfət Vəlizadə, Taleh İmanlı və Qulu Orucov ilə qabaqcadan əlbir olaraq hospitalın “VİP korpus”larına yerləşdirilərək daha yüksək səviyyəli tibbi və sair təminatla təchiz edilməsi müqabilində 6 nəfər şəxsdən ümumilikdə 10 min 500 manat pul vəsaitini almasına, həmçinin yenidən əmək müqaviləsinin bağlanması yolu ilə həmin müəssisədə fəaliyyətlərini davam etdirmələrinə görə hospitalın ayrı-ayrı əməkdaşlarından cəmi 5 min manat məbləğində pul vəsaitini rüşvət qismində istəməsinə əsaslı şübhələr müəyyən edilib.

İmran Ağayevin fasiləsiz şəkildə müəssisəyə qəbul olunmalarına dair görüntü yaratmaqla COVID-19 pandemiyasından əziyyət çəkən 140 nəfər xəstənin özünün təsisçisi və direktoru olduğu “Medi Style” MMC-nə məxsus Təcili Tibbi Yardım avtomobilləri vasitəsi ilə Modul Tipli Hospitala aparılması müqabilində həmin şəxslərdən xidmət haqqı qismində ümumilikdə cəmi 51 min 600 manat məbləğdə pul vəsaitini almasına əsaslı şübhələr müəyyən edilib.

Həmçinin, İmran Ağayevin müxtəlif tarixlərdə verdiyi COVID-19 test nəticəsi pozitiv çıxmış Rüfət Vəlizadənin (müəssisənin vəzifəli şəxsi) mütəmadi olaraq sərbəst şəkildə tibb müəssisəsinin inzibati binasını tərk edərək sərbəst şəraitdə hərəkət etməsinə şərait yaratmasına, həmin hərəkətləri ilə epidemiya əleyhinə, sanitariya-gigiyena və karantin rejimi qaydalarını pozaraq xəstəliyin yayılması ilə bağlı ağır nəticələrə səbəb olan real təhlükə yaratmasına əsaslı şübhələr müəyyən edilib.

İş üzrə toplanan sübutlar əsasında İmran Ağayev və digərlərinə müvafiq olaraq Cinayət Məcəlləsinin 139-1.2 (epidemiya əleyhinə rejimin, sanitariya-gigiyena və ya karantin rejimlərinin pozulması ağır nəticələrə səbəb olduqda), 308.2 (vəzifə səlahiyyətlərindən sui-istifadə etmə ağır nəticələrə səbəb olduqda), 311.3.1, 311.3.2 (rüşvət alma qabaqcadan əlbir olan bir qrup şəxs tərəfindən təkrar törədildikdə) maddələri ilə yekun ittiham elan edilib.