Leyla Əliyevanın təşəbbüsü ilə Moskvada “Qanın milləti yoxdur” adlı aksiya keçirilir - FOTO

Rusiya-Azərbaycan Gənclər Birliyi (AMOR) İ.M.Seçenov adına Birinci Moskva Dövlət Tibb Universitetinin (MDTU) dəstəyi ilə Moskvada “Qanın milləti yoxdur” adlı növbəti xeyriyyə aksiyası keçirir.

Respublikaxeber.az-ın report-a istinadən xəbərinə görə, Heydər Əliyev Fondunun vitse-prezidenti, AMOR-un sədri Leyla Əliyevanın təşəbbüsü ilə təşkil edilən humanitar tədbir MDTU-nun Kliniki transfuziologiya və hematologiya kafedrasında baş tutub.

Tədbirdə çıxış edən MDTU-da Azərbaycan klubunun sədri Simarə Məmmədova bildirib ki, azərbaycanlı gənclər xeyriyyə məqsədi ilə qan verirlər:

“Məqsədimiz onkoloji xəstəlikdən və COVID-19-dan əziyyət çəkən insanlara yardım etməkdir”.

Xatırladaq ki, qanvermə aksiyası 3 gün davam edəcək. Artıq 13 ildir mütəmadi olaraq keçirilən xeyriyyə aksiyasında minə yaxın gəncin iştirak edəcəyi gözlənilir.