Azərbaycanla Ermənistan arasında humanitar məqsədli atəşkəs başladı

Bu gün saat 12:00-dan etibarən humanitar məqsədlərlə Beynəlxalq Qırmızı Xaç Komitəsinin vasitəçiliyi və onun meyarlarına uyğun olaraq, hərbi əsirlər və digər saxlanılan şəxslər və ölənlərin meyitlərinin dəyişdirilməsi üçün atəşkəs elan olunur.

Bununla bağlı Rusiya tərəfinin təşəbbüsü əsasında bu ilin 9-10 oktyabr tarixlərində Moskva şəhərində keçirilən görüş nəticəsində Rusiya Federasiyası, Azərbaycan Respublikası və Ermənistan Respublikasının Xarici İşlər nazirlərinin qəbul etdiyi bəyanatda deyilir.

Bəyanata əsasən, atəşkəs rejiminin konkret parametrləri əlavə olaraq razılaşdırılacaq.

Azərbaycan Respublikası və Ermənistan Respublikası ATƏT-in Minsk Qrupunun həmsədrlərinin vasitəçiliyi ilə tənzimlənmənin əsas prinsipləri əsasında münaqişənin tezliklə sülh yolu ilə həlli məqsədilə substantiv danışıqlara başlayacaqlar.

Tərəflər danışıqlar formatının dəyişilməzliyini təsdiq ediblər.

Qeyd edək ki, sentyabrın 27-də işğalçı dövlət Azərbaycana qarşı bütün cəbhə boyunca təxribat törədib. Buna cavab olaraq Azərbaycan ordusu əks-hücum əməliyyatına başlayıb. Keçən müddət ərzində silahlı qüvvələrimiz mühüm strateji əhəmiyyətə malik olan Suqovuşan kəndini, Cəbrayıl şəhərini, Hadrut qəsəbəsini və onlarla kəndi işğaldan azad edib.





Sənəm Əliyeva