DQİDK-nın xidməti avtomobillərinin sayı artırılıb

Dini Qurumlarla İş üzrə Dövlət Komitəsinin xidməti avtomobillərin say həddi artırılıb.

APA-ya istinadən, Respublikaxəbər.az-ın məlumatına görə, bu Nazirlər Kabinetinin “Azərbaycan Respublikasında dövlət büdcəsindən maliyyələşən idarə, müəssisə və təşkilatlarda nəqliyyat vasitələrindən istifadə qaydalarının təkmilləşdirilməsi haqqında” Qərarındakı dəyişiklikdə əksini tapıb.

Dəyişikliyə əsasən, “Azərbaycan Respublikasının mərkəzi icra hakimiyyəti və məhkəmə orqanlarının aparatları (hərbi qurumlar, dövlət təhlükəsizliyi, xarici kəşfiyyat xidmətləri, hüquq mühafizə və prokurorluq orqanları, rayon (şəhər) məhkəmələri istisna olmaqla), mərkəzi icra hakimiyyəti orqanlarının yerli bölmələri, onların yanında, tabeliyində olan orqanlar, mərkəzi icra hakimiyyəti orqanlarının yanında yaradılan dövlət agentliklərinin, dövlət xidmətlərinin aparatları və onların yerli bölmələri üçün xidməti minik avtomobillərinin say həddi (limiti)”nin cədvəlinin 21-ci hissəsindəki dəyişikliyə əsasən qurumun xidməti avtomobillərinin say həddi aparat üzrə 5-dən 6-ya, cəmi say həddi isə 20-dən 21-ə çatdırılıb.




Sənəm Əliyeva