Torpaq Məcəlləsinə dəyişiklik edilib

“Azərbaycan Respublikasının Torpaq Məcəlləsinin tələblərinin pozulmasına görə Azərbaycan Respublikasının İnzibati Xətalar Məcəlləsinə əsasən Azərbaycan Respublikasının Əmlak Məsələləri Dövlət Komitəsi tərəfindən tətbiq edilən cərimələrdən (o cümlədən, onun tərəfindən inzibati xəta haqqında protokol tərtib edilərək baxılması üçün məhkəməyə göndərilən inzibati xətalar haqqında işlər üzrə tətbiq edilən cərimələrdən) toplanan və həmin orqanın hesabına köçürülən vəsaitdən istifadə Qaydası”nın təsdiq edilməsi barədə” Nazirlər Kabinetinin Qərarına dəyişiklik edilib.

APA-ya istinadən, Respublikaxəbər.az-ın məlumatına görə, Nazirlər Kabinetinin qərarla bağlı izahında bildirilib ki, İqtisadiyyat Nazirliyi yanında Əmlak Məsələləri Dövlət Xidməti - dövlət əmlakının idarə edilməsi, onun özəlləşdirilməsi, daşınmaz əmlakın dövlət reyestrinin, daşınmaz əmlakın vahid dövlət kadastrının tərtibi və aparılması, ünvan reyestrinin aparılması, dövlət torpaq kadastrı, yerquruluşu, torpaqların dövlət idarəetməsi, torpaq bazarının təşkili sahəsində dövlət siyasətini, habelə torpaqlardan istifadəyə və onların mühafizəsi sahəsində dövlət nəzarətini həyata keçirən, Azərbaycan Respublikası İqtisadiyyat Nazirliyinin strukturuna daxil olan qurumdur.

23 oktyabr 2019-cu ildə Azərbaycan Respublikasının İqtisadiyyat Nazirliyinin funksiyalarının və strukturunun genişləndirilməsi haqqında Azərbaycan Respublikası Prezidentinin Fərmanı ilə Əmlak Məsələləri Dövlət Komitəsi müvafiq dövlət xidməti statusunda Azərbaycan Respublikasının İqtisadiyyat Nazirliyinin strukturuna daxil edilib. Eyni zamanda, Torpaq Məcəlləsində və Şəhərsalma və Tikinti Məcəlləsində dəyişikliklər edilərək toplanan haqqın 7 faizinin dövlət büdcəsinə köçürülməsi müəyyən edilib.

Torpaq Məcəlləsinə edilmiş dəyişiklərə əsasən vəsaitin (25 faiz) İqtisadiyyat Nazirliyinin işçilərinin sosial müdafiəsini gücləndirmək məqsədi ilə həmin orqanın hesabına köçürülməsi nəzərdə tutulub. Qeyd olunanlara uyğun olaraq Nazirlər Kabinetinin müvafiq Qərarında Əmlak Məsələləri Dövlət Komitəsinin sözləri İqtisadiyyat Nazirliyi sözləri ilə əvəz edilərək dəyişiklik edilməsi barədə layihə hazırlanıb.




Sənəm Əliyeva