“Abşeron” qaz yatağında hasilata başlanılıb

Xəzər dənizinin Azərbaycan sektorunda, Bakıdan təxminən 100 kilometr cənub-şərqdə yerləşən "Abşeron" qaz-kondensat yatağının işlənməsinin İlkin Hasilat Sxemi mərhələsi üzrə hasilata başlanılıb.
Respublikaxeber.az-ın məlumatına görə, iqtisadçı Elşad Məmmədov bildirir ki, "Abşeron" yatağının işlənməsi artan tələbatı ödəmək üçün əlavə qaz tədarükünü təmin edəcək.
Onun sözlərinə görə, ölkədə daxili tələbatın artması bundan əvvəlki resursların daha çox ixracata yönləndirilməsinə şərait yaradacaq. Bu da Azərbaycanın beynəlxalq miqyasda yalnız neft deyil, həm də qaz ixracatı nöqteyi - nəzərindən regionun mühüm ölkələrindən birinə çevrilməsini göstərir.
Ekspert qeyd edir ki, “Abşeron” yatağındakı qazın həcmi gözləniləndən daha çoxdur. Bu isə bir daha sübut edir ki, Azərbaycan böyük enerji ehtiyatlarına malikdir və ölkənin təhlükəsizliyi Avropanın enerji təhlükəsizliyi deməkdir.