ŞƏKİDƏ RESTORAN SAHİBİ ŞAHMAR,QANUNA ŞAHLIQ EDİR.

Bu gün "Tütün məmulatlarının istifadəsinin məhdudlaşdırılması haqqında" qanuna əsasən, restoranlar, kafelər, barlar daxil olmaqla, ictimai-iaşə obyektlərində tütün çəkilməsinə icazə verilməsə də, bir sıra hallarda tütündən istifadənin şahidi oluruq. Görünür ya obyekt sahibləri qanundan xəbərsizdir, ya da müştəriləri narazı salmamaq üçün qanunun pozulmasına şərait yaradırlar.
Respublikaxəbər.az bildirir ki, respublikanın şəhər, rayon polis orqanları tərəfindən aidiyyəti təşkilatlarla birgə tütün məmulatlarından istifadə qaydasına riayət olunması ilə bağlı mütəmadi monitorinqlər keçirilir, fiziki və hüquqi şəxslər, fərdi sahibkarlar, eləcə də əhali arasında geniş izahat işləri aparılır.

Müəssisələr, idarələr və təşkilatlara gəlincə isə "Tütün məmulatlarının istifadəsinin məhdudlaşdırılması haqqında" qanuna əsasən, həmin yerlərdə tütün çəkmək üçün xüsusi sanitar-gigiyenik normalara cavab verən yerlər ayrılması barədə təbii ki, hər kəs məlumatlıdır.

Qanunvericilikdə göstərilənlərə əsasən həmçinin, məkanda müəyyən olunmuş tələblərə cavab verən şəkildə və görünən yerlərdə "tütün çəkmək qadağandır" xəbərdarlıq yazısının və ya işarəsinin yerləşdirilməsi inzibatçı tərəfindən təmin olunmalıdır.

Qeyd olunan qaydaların pozulması faktı İnzibati Xətalar Məcəlləsinin 212-ci maddəsinə (vəzifəli şəxslər dörd yüz manat məbləğində, hüquqi şəxslər min manat məbləğində cərimə edilir) əsasən məsuliyyət yaradır.

Qanuna əsasən qadağan edilmiş yerlərdə, yəni, restoranlar, kafelər, barlar daxil olmaqla, ictimai-iaşə obyektlərində tütün çəkilməsinin qarşısının alınmamasına görə vəzifəli şəxslər beş yüz manat məbləğində, hüquqi şəxslər min iki yüz manat məbləğində cərimə edilir.

Bu qeyd olunanlar hər bir vətəndaşa məlumdur.

Təbiidir ki, belə hallara çox yerdə və tez-tes rast gəlirik.
Qeyd edim ki, təxminən 5 gün bundan öncə Zaqatala rayon istiqamətindən Şəki istiqamətinə doğru hərəkətdə olarkən Şəkinin Aşağı Layısqı kəndi ərazisində yeni fəaliyyətə başlamış "ZƏHRA" Şadlıq evində el adəti üzrə toy mərasimin təşkil olunduğunu, musiqi səsindən hiss etdim və restoranın içərisinə daxil oldum. Amma daxil olmağıma peşiman oldum. Görünən mənzərədən əsəbləşməyim bir tərəfə, az qala mərasim iştirakçılarının çəkdikləri siqaretin tüstüsündən boğulmuşdum. Dərhal restoran sahibi Şahmar adlı şəxsə dost kimi yaxınlaşaraq, ona bir dost kimi iradımı bildirdim. Onun mənə verdiyi cavab belə oldu:
" Mən nə edim, nə qədər deyirəm, əməl etmirlər! özləri cərimələnəcək, mənə dəxli yoxdur. hətta masaların üzərinə siqaret çəkmək qadağandır! işarəsi də qoymuşam" Təəsüflər olsun ki, mən bir-neçə masanın üzərinə baxdım, elə bir xəbərdarlıq nişanı görmədim.

Odur ki, bu barədə tərəfimizdən yalnız həmin şadlıq evi ilə bağlı yox, qanunvericiliyə, eləcə də insanlara hörmətsizlik edərək, qapalı yerlərdə siqaret çəkənlərlə bağlı monitorinqlərin keçirilməsi üçün Şəki Şəhər İcra Hakimiyyətinə və eləcə də Şəki ŞRPŞ-nə rəsmi məlumat ktubu ünvanlanacaqdır.

Respublikaxəbər.az