Quba polisi oğrunu iş başında yaxaladı

Qubada oğurluq etməkdə şübhəli bilinən şəxs saxlanılıb.

Respublikaxeber.az KONKRET.az-ın şimal bürosuna istinadən xəbər verir ki, Baş Mühafizə İdarəsinin Quba Regional Mühafizə Şöbəsinin əməkdaşları rayon ərazisində oğurluq etməkdə şübhəli bilinən Süleyman Nəsrullayevi cinayət başında yaxalayıblar.

Axşam saatlarında xidmətdə olan polis əməkdaşları bir nəfərin sərxoş vəziyyətdə “Əczaxana” və “Məktəbli ləvazimatları” mağazalarının şüşəsini qıraraq oğurluğa cəhd etdiyini görüblər. Dərhal hərəkətə keçən polis əməkdaşları Xaçmaz rayon sakini Süleyman Nəsrullayevi saxlayaraq Quba Rayon Polis Şöbəsinə gətiriblər.

Araşdırmalar zamanı həmin şəxsin, rayon ərazisindəki mağazalardan bir neçə gün əvvəl də oğurluq etdiyi məlum olub.

Faktla bağlı Quba RPŞ-də araşdırma aparılır.