“İrşad Electronics” Mübariz İbrahimovun adını daşıyan liseyi komputerlərlə təchiz etdi - FOTO

Azərbaycan əsgərinin qəhrəmanlıq rəmzi sayılan Mübariz İbrahimovun şəhid olmasının 10-cu ildönümü ilə əlaqədar “İrşad Electronics” şirkəti Biləsuvar rayonunda yerləşən, Milli Qəhrəmanın adını daşıyan Biləsuvar Təhsil Kompleksini ziyarət edib.

Korporativ sosial məsuliyyət siyasəti çərçivəsində təşkil edilən ziyarətin əsas məqsədi gənc Mübarizlərin təhsilinə dəstək olmaq, gənclərdə vətənpərvərlik ruhunun aşılanmasına töhfə vermək idi. Bununla əlaqədar “İrşad Electronics” tərəfindən unudulmaz qəhrəmanımızın adını daşıyan liseyin informatika otağı yeni noutbuklar və proyektorla təchiz edilib.

Şagirdlərlə onlayn ünsiyyət zamanı qəhrəmanımızın hər kəsə örnək ola biləcək həyat yolu haqqında danışılıb, bu təhsil ocağında oxuyan gənclərin ölkəmizə layiqli vətəndaş olaraq yetişməsi üçün xüsusi məsuliyyət daşıdığı vurğulanıb. Lisey rəhbərliyi bu təşəbbüsə görə “İrşad Electronics” şirkətinə təşəkkür edərək, qəhrəmanımızın əziz xatirəsinin əbədiləşməsində rolu olan hər kəsə minnətdarlığını bildirib.

Daha sonra şirkət əməkdaşları rayonun Əliabad kəndinə yollanaraq, Mübarizin ata ocağını ziyarət ediblər. Ailəsi ilə görüş zamanı Mübarizin qəhrəmanlığından, onun Azərbaycan gənclərinə nümunə olmağından və hər bir azərbaycanlının onun mübarizə dolu həyatı ilə fəxr etməsindən bəhs olunub. Milli Qəhrəmanın atası Ağakərim İbrahimov “İrşad Electronics”in əməkdaşlarını Mübariz İbrahimova məxsus otaqda ona həsr olunmuş guşə ilə tanış edib.

Son olaraq “İrşad Electronics”in əməkdaşları öz şücaəti, vətənpərvərliyi ilə qəhrəmanlıq səlnaməsi yazmış Mübariz İbrahimovun məzarını ziyarət edərək, əklik qoyub və onun xatirəsini yad ediblər.

Xüsusi olaraq vurğulayaq ki, pandemiya ilə əlaqədar səfər və ziyarət zamanı infeksiyadan qorunmaq üçün TƏBIB-in tövsiyələrinə ciddi şəkildə riayət edilib.


Sənəm Əliyeva